MH370 reysinin 12 il əvvəl itməsi ilə bağlı yeni axtarışlar nəticəsiz başa çatıb

Malayziya Nəqliyyat Nazirliyi bazar günü bildirib ki, 12 il əvvəl itən “Malaysia Airlines” aviaşirkətinin MH370 reysinin qalıqlarının növbəti axtarışları yanvar ayında heç bir nəticə verməyib. Oxuməni.az xəbər verir ki, bu barədə BBC rus xidməti məlumat yayıb.
Bortunda 239 nəfər olan Boeing-777 təyyarəsi 8 mart 2014-cü ildə Kuala Lumpurdan Pekinə uçuş zamanı radarların ekranlarından yoxa çıxıb.
Sərnişinlərin üçdə ikisi çinli, qalanları isə malayziyalı, indoneziyalı və avstraliyalılar, həmçinin Hindistan, ABŞ, Niderland və Fransa vətəndaşları olub.
Hakimiyyət orqanları MH370 reysi ilə nə baş verdiyini öyrənmək üçün bir neçə dəfə cəhd edib, o cümlədən aviasiya tarixində ən böyük axtarışlar aparıb. Lakin nə təyyarə, nə sərnişinlər, nə də "qara qutular" tapılmayıb.
Dekabr ayında Britaniya-Amerika şirkəti “Ocean Infinity”-nin rəhbərliyi altında başlayan itkin düşmüş reysin növbəti axtarışları təxminən 15 000 kvadrat kilometr ərazini əhatə edib. Şirkət 6000 metr dərinliyə qədər enə bilən avtonom sualtı dronlardan istifadə edib. Lakin Malayziya Nəqliyyat Nazirliyinin bəyanatında deyilir ki, bütün səylər "təyyarənin qalıqlarının yerini təsdiq edən heç bir nəticə verməyib". Yanvarın 23-də axtarışlar rəsmi olaraq dayandırılıb.
Bazar günü, təyyarənin yoxa çıxmasının 12-ci ildönümündə, çinli sərnişinlərin ailələri son axtarışlar zamanı əldə etdikləri məlumat çatışmazlığını tənqid edən açıq məktub dərc ediblər.
"Biz axtarış işlərinin çətinliklərini başa düşürük", - qohumlar Malayziyanın Baş naziri Ənvər İbrahimə ünvanladıqları birgə açıq məktubda bildiriblər və təşəbbüsünə görə ona təşəkkür ediblər. "Lakin bu il yanvarın 15-dən etibarən ailələr axtarış işlərinin gedişi barədə heç bir əlavə məlumat almayıblar."
"Son iki ayda biz Malaysia Airlines və Çin hökuməti vasitəsilə Malayziya Nəqliyyat Nazirliyinə dəfələrlə müraciət etsək də, heç bir cavab almadıq", - onlar bildiriblər.
Almaz Həsənli