OpenAI Aİ istifadəçiləri üçün ChatGPT cavablarını işarələməyə başlayacaq

Yaxın bir neçə həftə ərzində OpenAI, ChatGPT tərəfindən yaradılan mətnləri və Codex vasitəsilə yazılan proqram kodlarını işarələməyə başlayacaq. Dəyişikliklər yalnız Aİ ölkələrindəki istifadəçilərə şamil olunacaq — avqustun 2-də Avropa İttifaqında tərtibatçıları yaradılmış kontenti işarələməyə məcbur edən qanun qüvvəyə minib. Oxuməni. az xəbər verir ki, bu barədə OpenAI-ın rəsmi saytı məlumat yayıb.

İşarələmə üçün OpenAI özünün "textGrain" texnologiyasından istifadə edəcək. Mətn yaradılarkən bu texnologiya model tərəfindən istifadə olunan müəyyən sözlərin seçilməsinin statistik ehtimalına təsir göstərəcək. Şirkətin bloqunda qeyd olunur ki, istifadəçilər dəyişiklikləri hiss etməyəcəklər: bu sözlər özlüyündə heç bir xüsusiyyətə malik deyil və onların düzülüşü işin nəticəsinə təsir etmir.

Bununla yanaşı, şirkət vurğulayır ki, mətndə su nişanının olmaması onun insan tərəfindən yazıldığına tam zəmanət vermir. Qısa mətnlərdə su nişanını aşkar etmək daha çətindir, həmçinin tərcümə və redaktə də tanınma prosesini çətinləşdirir. OpenAI-ın hesablamalarına görə, sözlərin 10%-nin sinonimlərlə əvəz edilməsi su nişanının aşkarlanma ehtimalını 92%-dən 66%-ə endirir, sözlərin 25%-i dəyişdirildikdə isə bu ehtimal 17%-ə düşür.

Su nişanları Aİ ərazisindəki bütün tarif planlarında ChatGPT və Codex istifadəçiləri üçün avtomatik olaraq tətbiq ediləcək. Digər istifadəçilər üçün su nişanları standart olaraq quraşdırılmayacaq, lakin OpenAI API-dən istifadə edən tərtibatçılar onu özləri aktivləşdirə biləcəklər.

OpenAI həmçinin vurğulayıb ki, mətndə su nişanının olması konkret istifadəçini identifikasiya etməyə imkan vermir.

Almaz Həsənli