AB Rusiyaya qarşı 20-ci sanksiya paketinə üçüncü ölkə limanlarını daxil edə bilər

Avropa Birliyi Rusiyaya qarşı 20-ci sanksiya paketinə Rusiya nefti ilə əməliyyatlar üçün üçüncü ölkə limanlarına məhdudiyyətlər daxil etmək niyyətindədir. Həmçinin, Rusiya ilə əlaqəli olduğu iddia edilən tankerlərin qara siyahısını 42 maddə ilə genişləndirməyi planlaşdırır. Reuters bu barədə Avropa Komissiyasının təsdiq üçün AB üzv dövlətlərinə təqdim etdiyi sənədə istinadən məlumat verir.

Agentliyin məlumatına görə, AK Gürcüstandakı Kulevi və İndoneziyanın Karimun limanlarına qarşı sanksiyalar təklif edir. O, həmçinin Tacikistan, Laos və Qırğızıstandan olan banklara məhdudiyyətlər tətbiq etməyi və iki Çin bankına qarşı məhdudiyyətləri qaldırmağı planlaşdırır.

Bir gün əvvəl "Kommersant" qəzeti fevral ayında qəbul edilməsi gözlənilən 20-ci sanksiya paketinin əsas müddəalarından birinin Rusiya neft daşınması xidmətlərinin göstərilməsinə tamamilə qadağa qoyulması ola biləcəyini bildirmişdi. Yeni məhdudiyyətlərin Rusiyanın neft ixracının 30-40%-ə qədərini təsir edəcəyi gözlənilir.

Əziz Mustafa