Məşhur komik Nurlan Saburov 7-12 il müddətinə azadlıqdan məhrum edilə bilər
Qazaxıstan Milli Təhlükəsizlik Komitəsi Nurlan Saburovun motosikletləri Vaqner döyüşçülərinə təhvil verdiyini göstərən video ilə bağlı araşdırma aparır.
Komitənin mətbuat xidmətindən Tengrinews.kz-ə verilən məlumata görə, Qazaxıstan Milli Təhlükəsizlik Komitəsi komediyaçı Nurlan Saburovla bağlı araşdırmaya başlayıb. Agentlik əlavə məlumat verməyib.
İstintaqa Saburovun Rusiyanın Ukraynadakı xüsusi hərbi əməliyyatında iştirak edən Vaqner İstra Legion bölməsinə 10 motosiklet təhvil verdiyi iddia edilən video səbəb olub. Video Saburovun Rusiyadan qovulmasından sonra geniş yayılıb. Çoxları onun saxta olduğunu düşünsə də, Factchek.kz jurnalistləri onun həqiqiliyini təsdiqləyiblər. Daha sonra məlum olub ki, qazaxıstanlı fəal Marat Turımbetov video ilə bağlı araşdırma tələbi ilə Baş Prokurorluğa müraciət edib.
Vəkil Bauyrjan Onqarovun sözlərinə görə, Saburov Qazaxıstanda Vaqner muzdlularını dəstəklədiyinə görə cinayət məsuliyyətinə cəlb oluna bilər. "Saburov Qazaxıstan Respublikası Cinayət Məcəlləsinin 170-ci maddəsinin 1-ci hissəsi - Muzdlu Fəaliyyətə əsasən Vaqner PMC muzdlularını maliyyələşdirdiyinə və onlara maddi dəstək verdiyinə görə 7 ildən 12 ilə qədər həbs cəzası ala bilər. Vaqner özəl hərbi şirkətdir, əsasən muzdlulardır. Nurlanın cinayəti 100% sübut olunub", - deyə vəkil Facebook-da yazıb Bu arada, Rusiya mediası Vaqner İstra Legionunun Vaqner PMC-nin ləğvindən sonra yaradılan Rusiya Müdafiə Nazirliyinin tərkibində bir bölmə olduğunu bildirir.
Nurlan Saburov Stepnoqorskda anadan olub və Rusiya televiziya kanalı TNT-də Stand Up layihəsinin rezidenti olduqdan sonra geniş şöhrət qazanıb. O, Rusiya və Qazaxıstan şəhərlərini uğurla gəzib, televiziyada solo stand-up komediya şouları ilə çıxış edib. O, məşhur "Sonra nə oldu?" komediya şousunun aparıcısıdır və filmlərdə və müxtəlif televiziya layihələrində rol alıb.
2020-ci ildə komediyaçı, Rusiya vətəndaşlığına malik olmasa da, Forbes Russia jurnalının 30 yaşdan kiçik 30 ən perspektivli rus siyahısına daxil olub. O dövrdə onun bir tamaşa üçün aldığı maaş 10.000 dollar olaraq qiymətləndirilirdi.
Bu ilin fevral ayının əvvəlində Saburovun hava limanının sərhəd nəzarətində Rusiyaya girişinə icazə verilmədi və ölkəyə girişinin 50 il müddətinə qadağan edildiyi elan edildi. Dövlət qurumlarının məlumatına görə, qərar 30 yanvarda qəbul edilib və "milli təhlükəsizlik və ənənəvi dəyərlərin qorunması"na əsaslanıb. Səbəb kimi immiqrasiya və vergi qanunlarının pozulması da göstərilib. Mediada yayılan məlumatlara görə, komediyaçı hazırda Almatıdadır.
Əziz MUSTAFA
