İtaliyada məşhur "Sevgililər tağı" dağılıb

İtaliyanın Apuliya bölgəsində, "Sevgililər tağı" kimi tanınan Sant'Andrea qayası pis hava şəraitinə görə dağılıb.
Oxuməni.az-ın verdiyi məlumata görə, bu barədə İtaliyanın “Corrieresalentino” nəşri xəbər verib.
Nəşrin yazdığına görə, hadisə fevralın 14-də, Sevgililər günündə baş verib və səbəbi pis hava şəraiti və dəniz eroziyası olub.
Melenduno kommunasının meri Mauritsio Cisternino hadisəni bütün bölgə üçün böyük itki və Salentonun turizm imici üçün ciddi zərbə adlandırıb. Onun sözlərinə görə, təbiət tağı yaradıb, lakin onu özü də dağıdıb.
Artıq bölgə rəsmiləri hadisə yerində işləyirlər. Onlar sahil boyunca çatların əmələ gəlməsi və yeni uçqunların baş verməsi barədə xəbərdarlıq edirlər. Polis və mülki müdafiə xidmətləri turistlərin və yerli sakinlərin təhlükəsizliyini təmin etmək üçün ərazini patrul edirlər.
Daha əvvəl bələdiyyə 4,5 milyon avro dəyərində sahil eroziyası ilə mübarizə layihəsi hazırlamışdı, lakin maliyyələşdirmə hələ ayrılmayıb. Fırtına həmçinin Apuliyanın çimərlik obyektlərinə, qayalarına və liman infrastrukturuna ziyan vurub. İtirilmiş tağ bölgənin sahil xəttinin kövrəkliyinin simvoluna çevrilib.
Almaz Həsənli