ABŞ Rusiya və Ukrayna ilə üçtərəfli danışıqları təxirə salıb
ABŞ prezidenti Donald Trampın xüsusi nümayəndəsi Stiven Uitkoffun bildirdiyinə görə, Amerika Birləşmiş Ştatları Ukrayna və Rusiya ilə müharibənin başa çatması ilə bağlı danışıqları bir neçə gün təxirə salıb. Oxuməni.az “Deutsche Welle”yə istinadla xəbər verir ki, o, çərşənbə axşamı CNBC telekanalına verdiyi açıqlamada Ukrayna, Rusiya və Amerika Birləşmiş Ştatları arasında üçtərəfli sülh danışıqlarının növbəti raundunun, böyük ehtimalla, "gələn həftənin müəyyən bir vaxtında" keçiriləcəyini bildirib.
Vaxtın dəyişdirilməsini Ukrayna prezidenti Vladimir Zelenski də təsdiqləyib. O, həmin gün Ukraynada jurnalistlərə verdiyi açıqlamada üçtərəfli görüşün hələlik gələn həftəyə təxirə salındığını bildirib. Zelenski qeyd edib ki, danışıqlar martın 10-11-də Türkiyədə planlaşdırılmışdı, lakin Yaxın Şərqdəki müharibə səbəbindən Amerika tərəfinin təşəbbüsü ilə təxirə salınıb. O, əlavə edib ki, Ukrayna nümayəndə heyəti Türkiyəyə getməyə hazır idi. Türkiyədən başqa, görüş yeri kimi İsveçrə də nəzərdən keçirilir. Danışıqların əvvəlki raundu fevralın ortalarında Cenevrədə keçirilmişdi.
Ukrayna prezidenti həmçinin qeyd edib ki, Kiyev Avropanın Rusiya ilə danışıqlara cəlb olunması üçün əlindən gələni edir. "Avropanın da bu istiqamətdə fəal olmasını istəyirik. Çünki başa düşürük ki, Avropa Rusiyadan onun danışıqlar masasında olmasını gözləməyəcək. Rusiya bunu istəmir, lakin biz Avropanın danışıqlarda iştirak etməsi üçün hər şeyi etməliyik, çünki Ukrayna Avropanın və gələcəkdə Aİ-nin bir hissəsidir", - deyə o bildirib.
Almaz Həsənli
