Ağ Ev Putinin Ukraynada müvəqqəti hakimiyyətin yaradılması təklifinə cavab verib

Ağ Ev Rusiya lideri Vladimir Putinin son təklifinə cavab verib. Kreml lideri seçkilərin keçirilməsi üçün Ukraynada “BMT-nin rəhbərlik etdiyi müvəqqəti administrasiya”nı tətbiq etmək istəyir. ABŞ bəyan edib ki, Ukraynada idarəçilik onun Konstitusiyası və ölkə xalqı tərəfindən müəyyən edilir.
Bu barədə “Reuters” agentliyinə Ağ Evin Milli Təhlükəsizlik Şurasının nümayəndəsi bildirib. Nəşr məmurun adını dəqiqləşdirmir.
"Ağ Evin Milli Təhlükəsizlik Şurasının sözçüsü Putinin müvəqqəti administrasiya ilə bağlı şərhləri ilə bağlı suala cavab olaraq bildirib ki, Ukraynanın idarəetmə sistemi onun konstitusiyası və ölkə əhalisi tərəfindən müəyyən edilir", - agentlik yazır.
Putin Ukraynada seçkilərin keçirilməsi üçün “BMT-nin himayəsi altında müvəqqəti administrasiya”nın tətbiqini təklif edib. “Reuters” xəbər verir ki, onun müvəqqəti administrasiya təklifi, prezident Vladimir Zelenskinin 2024-cü il mandatının sonundan sonra hakimiyyətdə qalması səbəbindən Ukrayna hökumətinin danışıqlarda legitim tərəfdaş olmadığı barədə uzun müddətdir davam edən şikayətinə cavab kimi görünür.
"Prinsip etibarı ilə, təbii ki, Ukraynada BMT, ABŞ, Avropa ölkələri və tərəfdaşlarımızın himayəsi altında müvəqqəti administrasiya tətbiq oluna bilər. Demokratik seçkilər keçirmək, xalqın etimadını qazanan həyat qabiliyyətli hökuməti hakimiyyətə gətirmək, sonra onlarla sülh müqaviləsi üzrə danışıqlara başlamaq üçün", - o deyib.
Yada salaq ki, qanuna görə, hərbi vəziyyət dövründə ölkədə seçkilərin keçirilməsi mümkün deyil. Bununla belə, dövlətin hazırkı rəhbərlərinin səlahiyyət müddətinin başa çatmasına baxmayaraq, legitim hakimiyyət olaraq qalması vacibdir. Eyni zamanda, hərbi vəziyyətin ləğvindən və ya müddətinin uzadılmamasından sonra seçkilərin keçirilməsi imkanı açılacaq. Bu, vətəndaşlara növbəti dəfə ölkə hökumətini - prezidenti 5 il, parlamenti isə 4 il müddətinə seçməyə imkan verəcək.
Almaz Həsənli