Britaniya 5 il müddətinə Ukraynada qoşun yerləşdirə bilər

Britaniya qoşunları münaqişədən sonra sülh sazişini dəstəkləmək üçün çox müzakirə olunan "istəklilər koalisiyası" planının bir hissəsi kimi beş il müddətinə Ukraynaya yerləşdirilə bilər, The Telegraph yazır.

Nəşr yazır: “Britaniya müttəfiqlərin müzakirə etdiyi planlar çərçivəsində beş il müddətinə Ukraynaya qoşun yeritməyi düşünür”.

Nəşr qeyd edir ki, variantlardan biri “Rusiyanı hər hansı sazişi pozmaqdan ilkin olaraq çəkindirmək və Kiyevə çox lazım olan nəfəs sahəsi vermək” məqsədi ilə Ukraynaya Avropa qüvvələrini göndərməkdir.

Plana əsasən, Franko-Britaniya “təhlükəsizlik qüvvələri” Ukraynaya öz hava və dəniz məkanının qorunmasında yardım təklif edəcək.

“Lakin yerləşdirmənin əsas məqsədi dərhal Rusiyanın yeni hücumunu dəf etmək üçün Ukrayna silahlı qüvvələrinin təlimi və yenidən qurulmasında yardım göstərməyə başlamaq olacaq”, - qəzet vurğulayır.

Daha sonra qoşunlar mərhələli şəkildə çıxarılacaq və son hərbi personal təxminən 5 ildən sonra Ukraynanı tərk edəcək.

Eyni zamanda, nəşrin yazdığı kimi, “istəklilər koalisiyası”nın bir gün əvvəl Brüsseldə keçirilən iclasında bəzi rəsmi nümayəndələr planların çox ləng getməsindən və qeyri-müəyyən qalmasından məyus olublar”.

Böyük Britaniyanın müdafiə naziri Con Hilli etiraf edib: "Biz hərbi planlaşdırmamızı dərinləşdiririk. Bu, hələ tamamlanmayıb".

Aİ diplomatiyasının rəhbəri Kaja Kallas deyib: "Hər hansı bir təhlükəsizlik qüvvəsinə gəldikdə, onların əslində nədən danışdıqlarını da bilməliyik. Bu çəkindirmədirmi? Monitorinqdirmi? Sülhməramlıdır? Məqsədimiz nədir?"

İsveçin müdafiə naziri Poul Johnson jurnalistlərə deyib: “Düşünürəm ki, missiyanın nədən ibarət olacağı və bizim nə edəcəyimiz barədə aydınlıq olsa, faydalı olardı”.

The Telegraph qeyd edir ki, bəzi ölkələr ABŞ-ın dəstəyi olmadan Ukraynaya qoşun yeritməkdən narahat olduqlarını bildiriblər.

Qəzet yazır: “İndiyədək cənab Tramp Birləşmiş Ştatların hər hansı təhlükəsizlik səylərində birbaşa iştirakına icazə verəcəyinə dair heç bir işarə verməyib”.

Əziz Mustafa, Oxuməni.az