Tramp Barak Obamanı dövlətə xəyanətdə ittiham edib

ABŞ prezidenti Donald Tramp ABŞ-ın keçmiş prezidenti Barak Obamanı vətənə xəyanətdə və 2020-ci il seçkilərini saxtalaşdırmaqda ittiham edib. Oxuməni.az-ın “Deutsche Welle”-yə istinadən verdiyi xəbərə görə, bunu Tramp çərşənbə axşamı, iyulun 22-də Ağ Evdə jurnalistlərlə söhbəti zamanı deyib.
"Bu, vətənə xəyanət idi. Seçkiləri oğurlamağa çalışdılar. Seçkiləri qarışdırmağa çalışdılar. Hətta başqa ölkələrdə belə, heç kimin ağlına belə gətirə bilməyəcəyi şeylər etdilər", - Tramp bildirib. O, “rəhbər” adlandırdığı Obama ilə yanaşı, o vaxtkı Demokrat namizəd Hillari Klintonu və onun sələfi Co Baydeni 2020-ci il seçkilərini saxtalaşdırmaqda ittiham edib.
"Onların bütün dəstəsi və seçkiləri saxtalaşdırmağa çalışdılar və yaxalandılar. 2020-ci ildə onlar doğrudan da seçkiləri saxtalaşdırdılar"- Tramp bildirib. “CNN”-in qeyd etdiyi kimi, ABŞ-da dövlətə xəyanət ölümlə cəzalandırılır.
Tramp çıxışında ABŞ Milli Kəşfiyyatının direktoru Tulsi Qabbardın ötən həftə dərc olunmuş hesabatına istinad edib. O, Obama və onun baş köməkçilərinin Rusiyanın 2016-cı il seçkilərinə təsir etmək cəhdləri ilə bağlı “uydurma və siyasiləşdirilmiş kəşfiyyat məlumatları” hazırladığı qənaətinə gəlib.
"Prezident səlahiyyətlərinə hörmət olaraq, biz adətən Ağ Evdən gələn daimi absurdları və dezinformasiyaları cavablandırmırıq. Lakin bu iddialar o qədər çılğındır ki, cavab verilməyə layiqdir,"- Barak Obamanın mətbuat katibi Patrik Rodenbuş bildirib.
“Bu qəribə ittihamlar gülüncdür və diqqəti yayındırmaq üçün zəif bir cəhddir. Keçən həftə dərc olunan sənəddə Rusiyanın 2016-cı il prezident seçkilərinə təsir göstərməyə çalışdığı, lakin səsləri uğurla manipulyasiya edə bilmədiyi barədə geniş qəbul edilmiş nəticəni təkzib edən heç nə yoxdur. Bu nəticələr, o vaxtkı sədri Mark Rubio olan iki partiyalı Senat Kəşfiyyat Komitəsinin 2020-ci il tarixli hesabatında təsdiqlənib”, - Obama administrasiyasının nümayəndəsi bildirib.
Almaz Həsənli