Aİ Komissiyasının rəhbəri inauqurasiyadan əvvəl Trampla görüşü təşkil etməyə çalışır

Avropa Komissiyasının sədri Ursula fon der Leyen ABŞ prezidenti kimi andiçmə mərasimindən əvvəl Donald Trampla görüş təşkil etməyə çalışır. Görüş Floridada baş tuta bilər.

Bu barədə Bloomberg xəbər verir.

Nəşrin mənbələrinə görə, Aİ rəsmisi və Trampın köməkçiləri arasında danışıqlar aparılıb, lakin yanvarın 20-dən əvvəl onun Floridadakı malikanəsinə səfər təşkil etməyin mümkün olub-olmayacağı hələlik bəlli deyil.

Görüşün təşkili səyləri fon der Leyenin doğma Almaniyada ağır sətəlcəm xəstəliyindən sağalmağa çalışdığı üçün tətildən sonra hələ də Brüsselə qayıtmaması ilə daha da çətinləşdi.

Bloomberg yazır ki, Aİ rəsmiləri indiyədək yeni administrasiyada yüksək səviyyəli həmkarları ilə daimi ünsiyyət kanalları açmaqda çətinlik çəkiblər. Tramp isə öz növbəsində dəfələrlə Avropanın ABŞ-la pis rəftar etməsindən şikayətlənib.

Cümə axşamı axşam fon der Leyen və Avropa Şurasının prezidenti Antonio Kosta transatlantik əlaqələri gücləndirməyi vəd edən eyni mesajlar verdilər.

"Biz ABŞ-ın yeni administrasiyası ilə ortaq dəyərlərimizə və maraqlarımıza əsaslanan müsbət əlaqələri səbirsizliklə gözləyirik. Sərt dünyada Avropa və ABŞ birlikdə daha güclüdür", - bəyanatda deyilir.

Oxuməni.az